عمر الشريف: فلوسي بتخلص.. وشكلي عجّز.. والناس مبقتش تعرفني

ففي تصريحاته الاخيرة لمجلة «بوابة الشباب» التابعة لجريدة «الأهرام»، قال الشريف بتلقائيته المعهودة: حاليا.. معنديش حاجة أعملها.. قاعد في الفنادق بقالي سنتين بدون شغل وفلوسي قربت تخلص، ما بعملش حاجة غير أني أتفرج على التلفزيون وآكل واستحمى، وقليل جدا لما أخرج.

وأضاف: من ساعة ما انفصلت عن فاتن حمامة وأنا معنديش بيت، حياتي كلها في الفنادق، معنديش غرفة نوم ولا مكان ينسيني التعب ومفيش حاجة تسليني غير التلفزيون اللي بكرهه ولكن معنديش غيره.

وتابع: أنا لا أتابع أي برامج في التلفزيون، وأكتفي بمتابعة الافلام لأنني لا أملك ترف النزول والذهاب الى السينما، وتسليتي الوحيدة هي الجلوس في بلكونة غرفتي المطلة على النيل، وأحيانا أنزل بالليل وأتمشى على كوبري قصر النيل علشان أشم رائحة هواء القاهرة.

واسترسل الشريف في حديثه قائلا: الناس لا يتعرفون عليّ بسهولة، لأني عجزت وشكلي اتغير والناس مابقتش تعرفني لما أمشي بالليل لوحدي، ولما حد يعرفني بيلم الناس عليّ وبقول لهم أنا عاوز أشم هوا براحتي، فيتركوني في حالي، لكن بصراحة مابقتش أشم هواء نظيفا، فقط دخان وعوادم وأخبط في الناس، القاهرة بقت صعبة قوي لكني بحبها.